kya KHub shakl thi ki bahut KHub-tar bani

kyā ḳhuub shakl thī ki bahut ḳhūb-tar banī

ik gul ko dekhte hī gulistāñ nazar banī

ham meñ to fāsla thā magar saa.e mil ga.e

tasvīr is visāl kī dīvār par banī

koshish meñ ik 'ajīb sī 'ujlat kā daḳhl hai

maiñ biij bo rahā thā ki ḳhvāhish samar banī

baiThe the ek bench pe kuchh der park meñ

itnā sā vāqi'a thā magar kyā ḳhabar banī

vo 'azm thā ki haTtī ga.iiñ ḳhud rukāvaTeñ

vo 'ishq thā ki raah kī dīvār dar banī

ham ne kiyā hai 'ishq baḌe e'timād se

ham ne kabhī nahīñ ye kahā jaan par banī

'āsim' zamīñ ne maañ kī tarah kī hai parvarish

barsoñ meñ ek shāḳh tavānā shajar banī

kya KHub shakl thi ki bahut KHub-tar bani

ek gul ko dekhte hi gulistan nazar bani

hum mein to fasla tha magar sae mil gae

taswir is visal ki diwar par bani

koshish mein ek 'ajib si 'ujlat ka daKHl hai

main bij bo raha tha ki KHwahish samar bani

baiThe the ek bench pe kuchh der park mein

itna sa waqi'a tha magar kya KHabar bani

wo 'azm tha ki haTti gain KHud rukawaTen

wo 'ishq tha ki rah ki diwar dar bani

hum ne kiya hai 'ishq baDe e'timad se

hum ne kabhi nahin ye kaha jaan par bani

'asim' zamin ne man ki tarah ki hai parwarish

barson mein ek shaKH tawana shajar bani