kya kya dilon ka KHauf chhupana paDa hamein

kyā kyā diloñ kā ḳhauf chhupānā paḌā hameñ

ḳhud Dar ga.e to sab ko Darānā paḌā hameñ

ik dūsre se bach ke nikalnā muhāl thā

ik dūsre ko rauñd ke jaanā paḌā hameñ

apne diye ko chāñd batāne ke vāste

bastī kā har charāġh bujhānā paḌā hameñ

vahshī havā ne aise barahna kiye badan

apnā lahū libās banānā paḌā hameñ

zelī hikāyatoñ meñ sabhī log kho ga.e

qissa tamām phir se sunānā paḌā hameñ

'ālī' anā pe sānehe kyā kyā guzar ga.e

kis kis kī samt haath baḌhānā paḌā hameñ

kya kya dilon ka KHauf chhupana paDa hamein

KHud Dar gae to sab ko Darana paDa hamein

ek dusre se bach ke nikalna muhaal tha

ek dusre ko raund ke jaana paDa hamein

apne diye ko chand batane ke waste

basti ka har charagh bujhana paDa hamein

wahshi hawa ne aise barahna kiye badan

apna lahu libas banana paDa hamein

zeli hikayaton mein sabhi log kho gae

qissa tamam phir se sunana paDa hamein

'ali' ana pe sanehe kya kya guzar gae

kis kis ki samt hath baDhana paDa hamein