kya kya na samne se zamane guzar gae

kyā kyā na sāmne se zamāne guzar ga.e

ik ġham thā jis ne saath na chhoḌā jidhar ga.e

betāb dil ke sāmne aur maslahat kī baat

chāhā na jaa.eñ bazm meñ un kī magar ga.e

sunte haiñ din shabāb ke jān-e-hayāt haiñ

lekin vo sub.h-o-shām jo ro kar guzar ga.e

kyā kyā maze uThā.e haiñ zabt-e-malāl meñ

dil ḳhuun ho gayā hai jo aañsū Thahar ga.e

Dartā huuñ maiñ ki zabt kā dāman na chhūT jaa.e

banda-navāz aap to had se guzar ga.e

kuchh kam nahīñ ye 'azmat-e-āvārgān-e-‘ishq

duniyā ne uñgliyāñ to uThā.īñ jidhar ga.e

dekhā 'ra.īs' tū ne zamāne kā ye tarīq

apne bhī aaj aañkh bachā kar guzar ga.e

kya kya na samne se zamane guzar gae

ek gham tha jis ne sath na chhoDa jidhar gae

betab dil ke samne aur maslahat ki baat

chaha na jaen bazm mein un ki magar gae

sunte hain din shabab ke jaan-e-hayat hain

lekin wo subh-o-sham jo ro kar guzar gae

kya kya maze uThae hain zabt-e-malal mein

dil KHun ho gaya hai jo aansu Thahar gae

Darta hun main ki zabt ka daman na chhuT jae

banda-nawaz aap to had se guzar gae

kuchh kam nahin ye 'azmat-e-awargan-e-‘ishq

duniya ne ungliyan to uThain jidhar gae

dekha 'rais' tu ne zamane ka ye tariq

apne bhi aaj aankh bacha kar guzar gae