kya nahin muqaddar mein kya likha nahin malum

kyā nahīñ muqaddar meñ kyā likhā nahīñ ma.alūm

āsmān chal jaa.e chaal kyā nahīñ ma.alūm

ham ne ek patthar ko dhaḌkaneñ atā kī haiñ

dekhte haiñ bantā hai kab ḳhudā nahīñ ma.alūm

haq kī baat kī ham ne kyā burā kiyā logo

kyoñ mizāj barham hai aap kā nahīñ ma.alūm

apne paas rahne de apnī jhūTī hamdardī

hāl-e-dil sunā.ūñ kyā tujh ko jā nahīñ ma.alūm

yā-ḳhudā bharam rakhnā merī be-navā.ī kā

tū diloñ se vāqif hai tujh ko kyā nahīñ ma.alūm

tinkā tinkā kar Daalā mere āshiyāne kā

kis taraf ko chaltī hai ab havā nahīñ ma.alūm

aaj mere dil meñ hai kal kahīñ pe hogī aur

kal Thikāna kyā hogā aas kā nahīñ ma.alūm

ham qarīb aa.e haiñ kitnī muddatoñ ke baa'd

duur phir kare lamha kaun sā nahīñ ma.alūm

kajravī meñ ham 'hasrat' haq ko bhuul baiThe haiñ

kis ko bebasī meñ deñ ab sadā nahīñ ma.alūm

kya nahin muqaddar mein kya likha nahin malum

aasman chal jae chaal kya nahin malum

hum ne ek patthar ko dhaDkanen ata ki hain

dekhte hain banta hai kab KHuda nahin malum

haq ki baat ki hum ne kya bura kiya logo

kyon mizaj barham hai aap ka nahin malum

apne pas rahne de apni jhuTi hamdardi

haal-e-dil sunaun kya tujh ko ja nahin malum

ya-KHuda bharam rakhna meri be-nawai ka

tu dilon se waqif hai tujh ko kya nahin malum

tinka tinka kar Dala mere aashiyane ka

kis taraf ko chalti hai ab hawa nahin malum

aaj mere dil mein hai kal kahin pe hogi aur

kal Thikana kya hoga aas ka nahin malum

hum qarib aae hain kitni muddaton ke ba'd

dur phir kare lamha kaun sa nahin malum

kajrawi mein hum 'hasrat' haq ko bhul baiThe hain

kis ko bebasi mein den ab sada nahin malum