kya pata hum ko mila hai apna

kyā patā ham ko milā hai apnā

aur kuchh nashsha chaḌhā hai apnā

kaan paḌtī nahīñ āvāz koī

dil meñ vo shor bapā hai apnā

ab to har baat pe hotā hai gumāñ

vāqi.a koī sunā hai apnā

har bagūle ko hai nisbat ham se

dasht tak saaya gayā hai apnā

ḳhud hī darvāze pe dastak dī hai

ḳhud hī dar khol diyā hai apnā

dil kī ik shāḳh-e-burīda ke sivā

chaman-e-dahr meñ kyā hai apnā

koī āvāz koī hañgāma

qāfila rukne lagā hai apnā

apnī āvāz pe chauñk uThtā hai

dil meñ jo chor chhupā hai apnā

kaun thā madd-e-muqābil 'bāqī'

ḳhud pe hī vaar paḌā hai apnā

kya pata hum ko mila hai apna

aur kuchh nashsha chaDha hai apna

kan paDti nahin aawaz koi

dil mein wo shor bapa hai apna

ab to har baat pe hota hai guman

waqia koi suna hai apna

har bagule ko hai nisbat hum se

dasht tak saya gaya hai apna

KHud hi darwaze pe dastak di hai

KHud hi dar khol diya hai apna

dil ki ek shaKH-e-burida ke siwa

chaman-e-dahr mein kya hai apna

koi aawaz koi hangama

qafila rukne laga hai apna

apni aawaz pe chaunk uThta hai

dil mein jo chor chhupa hai apna

kaun tha madd-e-muqabil 'baqi'

KHud pe hi war paDa hai apna