kya qahr hai zalim shab-e-furqat nahin jati

kyā qahr hai zālim shab-e-furqat nahīñ jaatī

aatī hai to aakar ye qayāmat nahīñ jaatī

pahle to bahāroñ meñ huā kartā thā saudā

ab daur-e-ḳhizāñ meñ bhī ye vahshat nahīñ jaatī

ḳhūbī kabhī jaatī nahīñ gulzār-e-vafā kī

pazhmurda bhī ho phuul to nik.hat nahīñ jaatī

kyā jazba-e-dil meñ bhī asar ab nahīñ baaqī

kyoñ aah sū-e-bāb-e-ijābat nahīñ jaatī

āḳhir vahī hotā hai jo marzī hai ḳhudā kī

rah jaatī hai tadbīr mashiyyat nahīñ jaatī

ye nashsha vo hai jis ko utarte nahīñ dekhā

jab sar meñ samā jaatī hai vahshat nahīñ jaatī

raftār yahī kahtī hai ab daur-e-zamāñ kī

rāhat chalī jaatī hai musībat nahīñ jaatī

ḳhālī na rahā hasrat-o-armāñ se mirā dil

armān nikal jaate haiñ hasrat nahīñ jaatī

unvāñ to bahut fann-o-adab ke hue sāqib

ai bazm-e-suḳhan terī zarūrat nahīñ jaatī

kya qahr hai zalim shab-e-furqat nahin jati

aati hai to aakar ye qayamat nahin jati

pahle to bahaaron mein hua karta tha sauda

ab daur-e-KHizan mein bhi ye wahshat nahin jati

KHubi kabhi jati nahin gulzar-e-wafa ki

pazhmurda bhi ho phul to nikhat nahin jati

kya jazba-e-dil mein bhi asar ab nahin baqi

kyon aah su-e-bab-e-ijabat nahin jati

aaKHir wahi hota hai jo marzi hai KHuda ki

rah jati hai tadbir mashiyyat nahin jati

ye nashsha wo hai jis ko utarte nahin dekha

jab sar mein sama jati hai wahshat nahin jati

raftar yahi kahti hai ab daur-e-zaman ki

rahat chali jati hai musibat nahin jati

KHali na raha hasrat-o-arman se mera dil

arman nikal jate hain hasrat nahin jati

unwan to bahut fann-o-adab ke hue saqib

ai bazm-e-suKHan teri zarurat nahin jati