کیا قہر ہے ظالم شب فرقت نہیں جاتی

کیا قہر ہے ظالم شب فرقت نہیں جاتی

آتی ہے تو آکر یہ قیامت نہیں جاتی

پہلے تو بہاروں میں ہوا کرتا تھا سودا

اب دور خزاں میں بھی یہ وحشت نہیں جاتی

خوبی کبھی جاتی نہیں گلزار وفا کی

پژمردہ بھی ہو پھول تو نکہت نہیں جاتی

کیا جذبۂ دل میں بھی اثر اب نہیں باقی

کیوں آہ سوئے باب اجابت نہیں جاتی

آخر وہی ہوتا ہے جو مرضی ہے خدا کی

رہ جاتی ہے تدبیر مشیت نہیں جاتی

یہ نشہ وہ ہے جس کو اترتے نہیں دیکھا

جب سر میں سما جاتی ہے وحشت نہیں جاتی

رفتار یہی کہتی ہے اب دور زماں کی

راحت چلی جاتی ہے مصیبت نہیں جاتی

خالی نہ رہا حسرت و ارماں سے مرا دل

ارمان نکل جاتے ہیں حسرت نہیں جاتی

عنواں تو بہت فن و ادب کے ہوئے ثاقب

اے بزم سخن تیری ضرورت نہیں جاتی