kya sach-much aap mere pas aana chahte hain

kyā sach-much aap mere paas aanā chāhte haiñ

yā sirf mere dil ko dahlānā chāhte haiñ

saarī haqīqatoñ kī sham'oñ kī lau katar do

ab log raushnī kā afsāna chāhte haiñ

āġhosh-e-vasl ab bhī kitnī rivāyatī hai

shādī-shuda badan bhī sharmānā chāhte haiñ

sab masjideñ girā kar sab mandiroñ ko Dhā kar

ham ik sharāb-ḳhāna banvānā chāhte haiñ

bhar jaa.eñ sab purāne zaḳhmoñ se koī kah de

kitne bahut se taaza zaḳhm aanā chāhte haiñ

ham kitnā chāhte haiñ ab tujh se kyā batā.eñ

chaubīs ghanTe har pal rozāna chāhte haiñ

paanī kā bulbula bhī kahte haiñ aap is ko

phir aap is badan ko kyoñ paanā chāhte haiñ

‘ehsās-farhat’ ab haiñ kal the jo 'farhat-ehsās'

dīvān apnā ulTā chhapvānā chāhte haiñ

kya sach-much aap mere pas aana chahte hain

ya sirf mere dil ko dahlana chahte hain

sari haqiqaton ki sham'on ki lau katar do

ab log raushni ka afsana chahte hain

aaghosh-e-wasl ab bhi kitni riwayati hai

shadi-shuda badan bhi sharmana chahte hain

sab masjiden gira kar sab mandiron ko Dha kar

hum ek sharab-KHana banwana chahte hain

bhar jaen sab purane zaKHmon se koi kah de

kitne bahut se taza zaKHm aana chahte hain

hum kitna chahte hain ab tujh se kya bataen

chaubis ghanTe har pal rozana chahte hain

pani ka bulbula bhi kahte hain aap is ko

phir aap is badan ko kyon pana chahte hain

‘ehsas-farhat’ ab hain kal the jo 'farhat-ehsas'

diwan apna ulTa chhapwana chahte hain