kya sarguzasht kahte ek nawak-e-nazar ki

kyā sarguzasht kahte ik nāvak-e-nazar kī

kāvish 'azāb-e-jāñ hai apne dil-o-jigar kī

furqat meñ terī ham ne yuuñ zindagī basar kī

mar-mar ke shab guzārī ro-ro ke har sahar kī

ik barq-e-nāz chamkī ḳhalvat se jab nazar kī

hai ḳhuub parda-dārī us shoḳh parda-dar kī

ham ḳhud hī DhūñD leñge ai ḳhizr apnī manzil

hājat nahīñ hai ham ko gum-gashta rāhbar kī

kyūñkar bachā.e koī mā'sūm dil ko apne

ik ik adā ġhazab hai us shoḳh fitna-gar kī

qaid-e-qafas meñ ab tak bhūle hue the gulshan

phir yaad aa rahī hai sayyād bāl-o-par kī

ḳhalvat-nashīñ hai maanā vo shāhid-e-ḳhud-ārā

har-sū usī ko paayā jab ġhaur se nazar kī

dā'vā-e-ittiqā thā zāhid se pārsā ko

mad.hosh kar ke chhoḌā saaqī ne jab nazar kī

pur-kaif rūh-parvar rashk-e-sharāb-e-kausar

ik ghūñT tū bhī pī le zāhid khiñchī hai ghar kī

sūfī-e-pāk-tīnat muftī-e-bā-sharī’at

karte haiñ ḳhāk-bosī pīr-e-muġhāñ ke dar kī

har naqsh-e-pā pe sajde 'sābit' yūñhī kiye jā

mil jā.egī kabhī to ḳhaak un ke rah-guzar kī

kya sarguzasht kahte ek nawak-e-nazar ki

kawish 'azab-e-jaan hai apne dil-o-jigar ki

furqat mein teri hum ne yun zindagi basar ki

mar-mar ke shab guzari ro-ro ke har sahar ki

ek barq-e-naz chamki KHalwat se jab nazar ki

hai KHub parda-dari us shoKH parda-dar ki

hum KHud hi DhunD lenge ai KHizr apni manzil

hajat nahin hai hum ko gum-gashta rahbar ki

kyunkar bachae koi ma'sum dil ko apne

ek ek ada ghazab hai us shoKH fitna-gar ki

qaid-e-qafas mein ab tak bhule hue the gulshan

phir yaad aa rahi hai sayyaad baal-o-par ki

KHalwat-nashin hai mana wo shahid-e-KHud-ara

har-su usi ko paya jab ghaur se nazar ki

da'wa-e-ittiqa tha zahid se parsa ko

madhosh kar ke chhoDa saqi ne jab nazar ki

pur-kaif ruh-parwar rashk-e-sharab-e-kausar

ek ghunT tu bhi pi le zahid khinchi hai ghar ki

sufi-e-pak-tinat mufti-e-ba-shari’at

karte hain KHak-bosi pir-e-mughan ke dar ki

har naqsh-e-pa pe sajde 'sabit' yunhi kiye ja

mil jaegi kabhi to KHak un ke rah-guzar ki