کیا تجھ کو بتائیں اے ہمدم کیا حشر کا ساماں ہوتا ہے

کیا تجھ کو بتائیں اے ہمدم کیا حشر کا ساماں ہوتا ہے

جب عشق کی جاں پر بنتی ہے جب حسن پشیماں ہوتا ہے

جو آنکھ سے آنسو بہتا ہے وہ ننگ غم جاں ہوتا ہے

وہ اشک گہر کہلاتا ہے پلکوں پہ جو رقصاں ہوتا ہے

کیا کیا نہ بہ نام لطف و کرم اے گردش دوراں ہوتا ہے

تخریب کے ساماں ہوتے ہیں تعمیر کا عنواں ہوتا ہے

کیا تجھ کو خبر ہے اے ناصح کیا چیز محبت ہوتی ہے

کیوں کر شب فرقت کٹتی ہے اور کیا غم ہجراں ہوتا ہے

اے اہل چمن اب تم ہی کہو یہ کار جنوں پیشہ تو نہیں

تنظیم نشیمن ہوتی ہے برباد گلستاں ہوتا ہے

برباد جفاؤں کی آندھی یوں ہوش اڑاتی ہے میرے

جس طرح ہوا سے اک آنچل گلشن میں پریشاں ہوتا ہے

کچھ درد وفا کی راہوں میں ہم راہ وہ چلتے تو ہیں مگر

ہو جاتے ہیں اوجھل نظروں سے اک موڑ نمایاں ہوتا ہے

اس زخم کی لذت کیا ہو بیاں اس درد کا عالم کیا کہئے

جس وقت کسی کا تیر نظر پیوست رگ جاں ہوتا ہے

مانا کہ بھنور میں کشتی ہے اور یورش طوفاں بھی ہے مگر

کیا خوف کمالؔ اب موجوں کا اللہ نگہباں ہوتا ہے