kya uski sifat mein guftugu hai

kyā us kī sifat meñ guftugū hai

jaisā thā vahī hai jo thā sū hai

āñkheñ haiñ to dekh le kahūñ kyā

hāzir nāzir hai rū-ba-rū hai

yak bain kī nazar meñ ek hai gā

ahvāl kī nigah meñ go ki do hai

tū sair kare hai jis chaman kī

har gul meñ sabā usī kī bū hai

vo tujh meñ hai tū hai usī meñ har-dam

kyā us kā surāġh-o-justujū hai

ai shaiḳh tū us kī kuchh haqīqat

mat pūchh ye sirr-e-gū-ma-gū hai

apnī apnī sī sab kaheñ haiñ

kab uqda ye hal kisū se ho hai

ye mas.ala lā-javāb hai gā

chup rahnā yahāñ hamārī ḳhū hai

chālīs baras hue ki 'hātim'

mashshāq-e-qadīm o kohna-go hai

kya us ki sifat mein guftugu hai

jaisa tha wahi hai jo tha su hai

aankhen hain to dekh le kahun kya

hazir nazir hai ru-ba-ru hai

yak bain ki nazar mein ek hai ga

ahwal ki nigah mein go ki do hai

tu sair kare hai jis chaman ki

har gul mein saba usi ki bu hai

wo tujh mein hai tu hai usi mein har-dam

kya us ka suragh-o-justuju hai

ai shaiKH tu us ki kuchh haqiqat

mat puchh ye sirr-e-gu-ma-gu hai

apni apni si sab kahen hain

kab uqda ye hal kisu se ho hai

ye masala la-jawab hai ga

chup rahna yahan hamari KHu hai

chaalis baras hue ki 'hatim'

mashshaq-e-qadim o kohna-go hai