kyon faza mein dilkashi thi raat kya tum aae the

kyoñ fazā meñ dilkashī thī raat kyā tum aa.e the

raushnī hī raushnī thī raat kyā tum aa.e the

ek ḳhushbū sī uḌī thī raat kyā tum aa.e the

ruuh tak mahkī huī thī raat kyā tum aa.e the

ek aahaT to sunī thī raat kyā tum aa.e the

dil pe dastak bhī huī thī raat kyā tum aa.e the

kis ke istiqbāl ko be-jān manzar jaag uThe

ruuh kis ne phūñk dī thī raat kyā tum aa.e the

haath kis ne rakh diyā thā muztarib dil par mire

chain se niiñd aa ga.ī thī raat kyā tum aa.e the

ik karishma hai marīz-e-'ishq kā uTh baiThnā

nabz to Duubī huī thī raat kyā tum aa.e the

kaif meñ Duubī huī thī vajd meñ thī kā.enāt

kis ke naġhme gā rahī thī raat kyā tum aa.e the

zarra zarra nuur ke TukḌoñ meñ jaise baT gayā

chāñdnī bikhrī huī thī raat kyā tum aa.e the

dekhne vāloñ meñ hoñge 'shād' bhī nāshād bhī

mujh pe taarī be-ḳhudī thī raat kyā tum aa.e the

kyon faza mein dilkashi thi raat kya tum aae the

raushni hi raushni thi raat kya tum aae the

ek KHushbu si uDi thi raat kya tum aae the

ruh tak mahki hui thi raat kya tum aae the

ek aahaT to suni thi raat kya tum aae the

dil pe dastak bhi hui thi raat kya tum aae the

kis ke istiqbaal ko be-jaan manzar jag uThe

ruh kis ne phunk di thi raat kya tum aae the

hath kis ne rakh diya tha muztarib dil par mere

chain se nind aa gai thi raat kya tum aae the

ek karishma hai mariz-e-'ishq ka uTh baiThna

nabz to Dubi hui thi raat kya tum aae the

kaif mein Dubi hui thi wajd mein thi kaenat

kis ke naghme ga rahi thi raat kya tum aae the

zarra zarra nur ke TukDon mein jaise baT gaya

chandni bikhri hui thi raat kya tum aae the

dekhne walon mein honge 'shad' bhi nashad bhi

mujh pe tari be-KHudi thi raat kya tum aae the