kyon uski talKH mujhse sada guftugu rahi

kyoñ us kī talḳh mujh se sadā guftugū rahī

har lamha jis kī 'rāz' mujhe aarzū rahī

ḳhud apne aap ko bhī parakhne ke shauq meñ

ik umr aa.ine kī mujhe justujū rahī

maidān-e-kār-zār meñ auroñ ke sāth-sāth

merī anā kī teġh mire dū-badū rahī

ab ke havā-e-shahr taraqqī kī den hai

būḌhoñ meñ bāñkpan na vo bachchoñ meñ ḳhū rahī

har daur meñ to tū hī rahā mauzū-e-suḳhan

har daur meñ tirī hī sadā guftugū rahī

phir us ne 'rāz' chhū liye sāġhar ke surḳh hoñT

ḳhatre meñ ahl-e-zarf kī phir aabrū rahī

kyon us ki talKH mujh se sada guftugu rahi

har lamha jis ki 'raaz' mujhe aarzu rahi

KHud apne aap ko bhi parakhne ke shauq mein

ek umr aaine ki mujhe justuju rahi

maidan-e-kar-zar mein auron ke sath-sath

meri ana ki tegh mere du-badu rahi

ab ke hawa-e-shahr taraqqi ki den hai

buDhon mein bankpan na wo bachchon mein KHu rahi

har daur mein to tu hi raha mauzu-e-suKHan

har daur mein teri hi sada guftugu rahi

phir us ne 'raaz' chhu liye saghar ke surKH honT

KHatre mein ahl-e-zarf ki phir aabru rahi