kyun ho na gir ke kasa-e-tadbir pash pash

kyuuñ ho na gir ke kāsa-e-tadbīr paash paash

hai sañg-e-ġham se shīsha-e-taqdīr paash paash

hai ḳhūn-e-be-gunah se jigar resh-e-teġh bhī

jauhar nahīñ ye hai tan-e-shamshīr paash paash

tīr-e-nigah ne dil mirā ġhirbāl kar diyā

zaḳhmoñ se ho gayā tan-e-naḳhchīr paash paash

teġh-e-zabān-e-yār se majrūh hai jigar

hotā hai dil mirā dam-e-taqrīr paash paash

ai teġh-e-kalik likh vo mazāmīn-e-ta.aniya

dil hāsidoñ ke hoñ dam-e-tahrīr paash paash

'zebā' ġhazal to tum ne kahī is zamīñ meñ ḳhuub

sābit har ik jagah hai ba-tadbīr paash paash

kyun ho na gir ke kasa-e-tadbir pash pash

hai sang-e-gham se shisha-e-taqdir pash pash

hai KHun-e-be-gunah se jigar resh-e-tegh bhi

jauhar nahin ye hai tan-e-shamshir pash pash

tir-e-nigah ne dil mera ghirbaal kar diya

zaKHmon se ho gaya tan-e-naKHchir pash pash

tegh-e-zaban-e-yar se majruh hai jigar

hota hai dil mera dam-e-taqrir pash pash

ai tegh-e-kalik likh wo mazamin-e-taniya

dil hasidon ke hon dam-e-tahrir pash pash

'zeba' ghazal to tum ne kahi is zamin mein KHub

sabit har ek jagah hai ba-tadbir pash pash