kyun ju-e-rawan aa ke yun aankhon mein khaDi hai

kyuuñ jū-e-ravāñ aa ke yuuñ āñkhoñ meñ khaḌī hai

lagtā hai pahāḌoñ pe kahīñ barf paḌī hai

ai dard kabhī uTh bhī sahī tañgi-e-dil se

muddat se dar-e-dil pe koī yaad khaḌī hai

manzil ko chale yā kisī maqtal ko chale haiñ

har raah yuuñ lagtī hai ki zanjīr paḌī hai

yūñhī to nahīñ baiTh ga.e jhaaḌ ke dāman

mahrūmī-e-taqdīr se ummīd baḌī hai

do din kī mohabbat ne dī ye hastī-e-jāved

ik pal bhī nahīñ kaTtī abhī umr paḌī hai

yuuñ ham ne nikālī hai tirī rāh-e-mulāqāt

yuuñ hijr tire diid kī barakat kī ghaḌī hai

har sub.h tirī chashm-e-fusūñ-sāz kā ġhamza

har shaam tire lab se hañsī phuuT paḌī hai

din hai to hai mahkā tire ruḳhsār kā ġhāza

shab hai to tirī maañg sitāroñ se jaḌī hai

kyun ju-e-rawan aa ke yun aankhon mein khaDi hai

lagta hai pahaDon pe kahin barf paDi hai

ai dard kabhi uTh bhi sahi tangi-e-dil se

muddat se dar-e-dil pe koi yaad khaDi hai

manzil ko chale ya kisi maqtal ko chale hain

har rah yun lagti hai ki zanjir paDi hai

yunhi to nahin baiTh gae jhaD ke daman

mahrumi-e-taqdir se ummid baDi hai

do din ki mohabbat ne di ye hasti-e-jawed

ek pal bhi nahin kaTti abhi umr paDi hai

yun hum ne nikali hai teri rah-e-mulaqat

yun hijr tere did ki barakat ki ghaDi hai

har subh teri chashm-e-fusun-saz ka ghamza

har sham tere lab se hansi phuT paDi hai

din hai to hai mahka tere ruKHsar ka ghaza

shab hai to teri mang sitaron se jaDi hai