kyun mujhse gurezan hai main tera muqaddar hun

kyuuñ mujh se gurezāñ hai maiñ terā muqaddar huuñ

ai umr-e-ravāñ ḳhush huuñ maiñ tujh ko mayassar huuñ

maiñ aap bahār apnī maiñ apnā hī manzar huuñ

ḳhud apne hī ḳhvāboñ kī ḳhushbū se mo'attar huuñ

be-rañg na vāpas kar ik sañg hī de sar ko

kab se tirā tālib huuñ kab se tire dar par huuñ

jab jaisī zarūrat ho ban jaatā huuñ vaisā hī

ḳhud apnī tabī'at meñ shīsha huuñ na patthar huuñ

lamhoñ ke tasalsul meñ marzī hai mirī shāmil

maiñ vaqt kī shah-rag par rakkhā huā ḳhanjar huuñ

āsūda huuñ maiñ apne vīrāna-e-hastī meñ

duniyā tujhe milne ke imkān se bāhar huuñ

jab chāhūñ simaT kar maiñ zarre meñ samā jā.ūñ

vus'at meñ to vaise hī sahrā huuñ samundar huuñ

kyun mujh se gurezan hai main tera muqaddar hun

ai umr-e-rawan KHush hun main tujh ko mayassar hun

main aap bahaar apni main apna hi manzar hun

KHud apne hi KHwabon ki KHushbu se mo'attar hun

be-rang na wapas kar ek sang hi de sar ko

kab se tera talib hun kab se tere dar par hun

jab jaisi zarurat ho ban jata hun waisa hi

KHud apni tabi'at mein shisha hun na patthar hun

lamhon ke tasalsul mein marzi hai meri shamil

main waqt ki shah-rag par rakkha hua KHanjar hun

aasuda hun main apne virana-e-hasti mein

duniya tujhe milne ke imkan se bahar hun

jab chahun simaT kar main zarre mein sama jaun

wus'at mein to waise hi sahra hun samundar hun