kyunkar rafugari ho dil-e-tar-tar ki

kyūñkar rafūgarī ho dil-e-tār-tār kī

koī ḳhabar sunāo mire ġham-gusār kī

aa jā shab-e-firāq mujhe aa ke thaam le

ik tū hī to amiiñ hai mire intizār kī

chāk-e-jigar na chāk-e-garebāñ kī fikr hai

hai mujh ko fikr dāman-e-sad-dāġhdār kī

ik sail-e-be-karāñ sā hai jazbāt kā hujūm

tuġhyāniyoñ meñ ġharq hai kashtī qarār kī

naġhme bikhar ga.e haiñ fazāoñ meñ duur tak

Dolī bahut qarīb hai fasl-e-bahār kī

pahuñchīñ murādeñ 'arsh pe sajde ke dosh par

kyā kyā bulandiyāñ haiñ mire iḳhtiyār kī

zindān-e-zīst bār-e-nafas aur shauq-e-vasl

ab ho nazar 'zahīr' pe parvardigār kī

kyunkar rafugari ho dil-e-tar-tar ki

koi KHabar sunao mere gham-gusar ki

aa ja shab-e-firaq mujhe aa ke tham le

ek tu hi to amin hai mere intizar ki

chaak-e-jigar na chaak-e-gareban ki fikr hai

hai mujh ko fikr daman-e-sad-daghdar ki

ek sail-e-be-karan sa hai jazbaat ka hujum

tughyaniyon mein gharq hai kashti qarar ki

naghme bikhar gae hain fazaon mein dur tak

Doli bahut qarib hai fasl-e-bahaar ki

pahunchin muraden 'arsh pe sajde ke dosh par

kya kya bulandiyan hain mere iKHtiyar ki

zindan-e-zist bar-e-nafas aur shauq-e-wasl

ab ho nazar 'zahir' pe parwardigar ki