کیوں کر رفوگری ہو دل تار تار کی

کیوں کر رفوگری ہو دل تار تار کی

کوئی خبر سناؤ مرے غم گسار کی

آ جا شب فراق مجھے آ کے تھام لے

اک تو ہی تو امیں ہے مرے انتظار کی

چاک جگر نہ چاک گریباں کی فکر ہے

ہے مجھ کو فکر دامن صد داغ دار کی

اک سیل بے کراں سا ہے جذبات کا ہجوم

طغیانیوں میں غرق ہے کشتی قرار کی

نغمے بکھر گئے ہیں فضاؤں میں دور تک

ڈولی بہت قریب ہے فصل بہار کی

پہنچیں مرادیں عرش پہ سجدے کے دوش پر

کیا کیا بلندیاں ہیں مرے اختیار کی

زندان زیست بار نفس اور شوق وصل

اب ہو نظر ظہیرؔ پہ پروردگار کی