lakh bujhao bujhti nahin hai KHirman-e-jaan se madfan tak

laakh bujhāo bujhtī nahīñ hai ḳhirman-e-jāñ se madfan tak

ātish-e-gul jab aa jaatī hai baḌhte baḌhte dāman tak

ik vaqt aisā aa.egā zanjīr-e-safar bhī TūTegī

saath mire jab ruk jā.egā 'umr-e-ravāñ kā tausan tak

zarra zarra arz-o-samā kā apnī qīmat rakhtā hai

husn-e-nazar kā khel hai saarā vīrāne se gulshan tak

khulte hī muTThī ham-safaroñ par sakte jaisā 'ālam thā

dekh ke mere raḳht-e-safar ko nam-dīda thā rahzan tak

is duniyā ne ham par us ke darvāze jab band kiye

ham ne ḳhud ko ḳhaak kiyā aur uḌ kar pahuñche rauzan tak

lakh bujhao bujhti nahin hai KHirman-e-jaan se madfan tak

aatish-e-gul jab aa jati hai baDhte baDhte daman tak

ek waqt aisa aaega zanjir-e-safar bhi TuTegi

sath mere jab ruk jaega 'umr-e-rawan ka tausan tak

zarra zarra arz-o-sama ka apni qimat rakhta hai

husn-e-nazar ka khel hai sara virane se gulshan tak

khulte hi muTThi ham-safaron par sakte jaisa 'alam tha

dekh ke mere raKHt-e-safar ko nam-dida tha rahzan tak

is duniya ne hum par us ke darwaze jab band kiye

hum ne KHud ko KHak kiya aur uD kar pahunche rauzan tak