لاکھ بجھاؤ بجھتی نہیں ہے خرمن جاں سے مدفن تک

لاکھ بجھاؤ بجھتی نہیں ہے خرمن جاں سے مدفن تک

آتش گل جب آ جاتی ہے بڑھتے بڑھتے دامن تک

اک وقت ایسا آئے گا زنجیر سفر بھی ٹوٹے گی

ساتھ مرے جب رک جائے گا عمر رواں کا توسن تک

ذرہ ذرہ ارض و سما کا اپنی قیمت رکھتا ہے

حسن نظر کا کھیل ہے سارا ویرانے سے گلشن تک

کھلتے ہی مٹھی ہم سفروں پر سکتے جیسا عالم تھا

دیکھ کے میرے رخت سفر کو نم دیدہ تھا رہزن تک

اس دنیا نے ہم پر اس کے دروازے جب بند کئے

ہم نے خود کو خاک کیا اور اڑ کر پہنچے روزن تک