lakh pardon mein go nihan hum the

laakh pardoñ meñ go nihāñ ham the

phir bhī har chiiz se ayaañ ham the

ek aalam ke tarjumāñ ham the

un ke aage hī be-zabāñ ham the

ham hī ham the vahāñ jahāñ ham the

aap aa.e to phir kahāñ ham the

har rag-o-pai meñ barq raqsāñ thī

haa.e vo vaqt jab javāñ ham the

aaj to ḳhair se haiñ arsh-maqām

kal zamīñ par bhī āsmāñ ham the

ġham ke māroñ ko naaz thā ham par

jazba-e-ġham ke tarjumāñ ham the

har qadam pe thī sāmne manzil

sū-e-manzil ravāñ-davāñ ham the

zindagī bhar jo lab pe aa na sakī

dard-o-ġham kī vo dāstāñ ham the

dostoñ kā to zikr kyā 'ātish'

dushmanoñ par bhī mehrbāñ ham the

lakh pardon mein go nihan hum the

phir bhi har chiz se ayan hum the

ek aalam ke tarjuman hum the

un ke aage hi be-zaban hum the

hum hi hum the wahan jahan hum the

aap aae to phir kahan hum the

har rag-o-pai mein barq raqsan thi

hae wo waqt jab jawan hum the

aaj to KHair se hain arsh-maqam

kal zamin par bhi aasman hum the

gham ke maron ko naz tha hum par

jazba-e-gham ke tarjuman hum the

har qadam pe thi samne manzil

su-e-manzil rawan-dawan hum the

zindagi bhar jo lab pe aa na saki

dard-o-gham ki wo dastan hum the

doston ka to zikr kya 'atish'

dushmanon par bhi mehrban hum the