لاکھوں حسیں ملے ہیں طرحدار کی طرح

لاکھوں حسیں ملے ہیں طرحدار کی طرح

لیکن ملا نہ کوئی مرے یار کی طرح

قاتل ہے کون ابروئے خم دار کی طرح

چبھنے میں تیر کاٹ میں تلوار کی طرح

ہے دائرہ حیات کا زنجیر کی مثال

گردش میں لوگ رہتے ہیں پرکار کی طرح

منزل کی سمت کیوں نہ اٹھے شوق کا قدم

ہم راہ دل ہے قافلہ سالار کی طرح

مجموعۂ تضاد ہوئی ان کی گفتگو

اقرار بھی وہ کرتے ہیں انکار کی طرح

ہم وحشیوں کا حال جو وہ دیکھنے چلے

صحرا بھی ہو گیا ہے چمن زار کی طرح

دشت جنوں میں آبلہ پا کو سکوں کہاں

فرش زمیں ہے بستر سوفار کی طرح

وعدہ جو کر رہے ہیں تو پورا بھی کیجئے

دھوکا نہ دیجئے مجھے ہر بار کی طرح

وہ پیکر جمال سراپا نظارہ تھا

اپنی خودی حجاب تھی دیوار کی طرح