لبوں کی جنبش نوائے بلبل ہے شوخ لہجہ ترا قیامت
دراز قامت غزال آنکھیں گلاب چہرہ ترا قیامت
گھٹائیں زلفیں خمار پلکیں مہین آنچل پہ ماہ و انجم
سہانی راتوں کی چاندنی میں ہے چھت پہ جلوہ ترا قیامت
زمین دل پر ادائے دلبر چلائے نشتر اٹھائے محشر
نظر اٹھانا نظر جھکانا ہر ایک حربہ ترا قیامت
گلوں کی لالی شگفتہ عارض پہ فصل گل کی سفیر ٹھہری
نشیلے لب کی حلاوتوں سے دھڑکتا نغمہ ترا قیامت
جو تو نے کھولے ہوا میں گیسو مہک اٹھا ہے تمام گلشن
حسین سنبل کے درمیاں ہے دمکتا چہرہ ترا قیامت
ترے شبستاں کے گوشے گوشے میں روشنی کا ظہور ہر پل
عقیدتوں کے دیے سے روشن نفیس کمرہ ترا قیامت
کنول بدن پر مچلتی سانسیں چھلکتے ساغر کی ترجماں ہے
گداز بانہیں صراحی گردن سراپا نقشہ ترا قیامت
وفائیں مجھ سے جفائیں مجھ سے ادائیں ہر پل یہی ہیں ذاکرؔ
کبھی ہے غمزہ کبھی ہے عشوہ یہ ناز نخرہ ترا قیامت
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
