labon tak aaya zaban se magar kaha na gaya

laboñ tak aayā zabāñ se magar kahā na gayā

fasāna dard kā al-muḳhtasar kahā na gayā

harīm-e-nāz meñ kyā baat thī jo raaz rahī

vo harf kyā thā jo bār-e-digar kahā na gayā

ye hādsa bhī ajab hai ki tere ġham ke sivā

kisī bhī ġham ko ġham-e-mo'tabar kahā na gayā

nafas nafas meñ thā ehsās-e-ḳhāna-vīrānī

ḳharāba-e-ġham-e-hastī ko ghar kahā na gayā

talāsh kartā huuñ īmā-e-iltifāt abhī

vo kyā nazar thī ki jis ko nazar kahā na gayā

junūñ ne fikr-o-nazar ko vo rif.ateñ baḳhshīñ

ḳhirad ko ham se kabhī dīda-var kahā na gayā

na koī shor na ġhauġhā na hāv-hū na ḳharosh

ḳhizāñ ko mausam-e-derīna-gar kahā na gayā

dil iztirāb-e-guzārish kā mahsharistāñ thā

kisī ke sāmne kuchh bhī magar kahā na gayā

labon tak aaya zaban se magar kaha na gaya

fasana dard ka al-muKHtasar kaha na gaya

harim-e-naz mein kya baat thi jo raaz rahi

wo harf kya tha jo bar-e-digar kaha na gaya

ye hadsa bhi ajab hai ki tere gham ke siwa

kisi bhi gham ko gham-e-mo'tabar kaha na gaya

nafas nafas mein tha ehsas-e-KHana-virani

KHaraba-e-gham-e-hasti ko ghar kaha na gaya

talash karta hun ima-e-iltifat abhi

wo kya nazar thi ki jis ko nazar kaha na gaya

junun ne fikr-o-nazar ko wo rifaten baKHshin

KHirad ko hum se kabhi dida-war kaha na gaya

na koi shor na ghaugha na haw-hu na KHarosh

KHizan ko mausam-e-derina-gar kaha na gaya

dil iztirab-e-guzarish ka mahsharistan tha

kisi ke samne kuchh bhi magar kaha na gaya