lafz kuchh aur hain abru ka ishaara kuchh aur

lafz kuchh aur haiñ abrū kā ishāra kuchh aur

ab ke lagtā hai ki zālim kā hai manshā kuchh aur

mujh ko ma.alūm na thā aisī bhī hotī hogī

zindagī kā thā tasavvur meñ to naqshā kuchh aur

yuuñ ḳhamoshī se nahātā nahīñ ḳhuuñ meñ apne

ai mirī ḳhāk-e-vatan tujh se hai va.ada kuchh aur

bad-gumānī bhī nahīñ itnī kisī se achchhī

maiñ ne kuchh aur kahā aap ne samjhā kuchh aur

aur bhī kitne tarīqe the sitam ke raa.ij

zulm Dhāne kā magar terā tarīqa kuchh aur

zulm kī umr bahut lambī nahīñ hotī hai

sabr se kar lo sitam us ke gavāra kuchh aur

khel kuchh aur madārī ke abhī baaqī haiñ

chāhte bhī haiñ ki dekheñ ye tamāsha kuchh aur

zindagī jaisī bhī ho shikva nahīñ karte 'dānish'

dard-mandoñ kā hai jiine kā tarīqa kuchh aur

lafz kuchh aur hain abru ka ishaara kuchh aur

ab ke lagta hai ki zalim ka hai mansha kuchh aur

mujh ko malum na tha aisi bhi hoti hogi

zindagi ka tha tasawwur mein to naqsha kuchh aur

yun KHamoshi se nahata nahin KHun mein apne

ai meri KHak-e-watan tujh se hai wada kuchh aur

bad-gumani bhi nahin itni kisi se achchhi

main ne kuchh aur kaha aap ne samjha kuchh aur

aur bhi kitne tariqe the sitam ke raij

zulm Dhane ka magar tera tariqa kuchh aur

zulm ki umr bahut lambi nahin hoti hai

sabr se kar lo sitam us ke gawara kuchh aur

khel kuchh aur madari ke abhi baqi hain

chahte bhi hain ki dekhen ye tamasha kuchh aur

zindagi jaisi bhi ho shikwa nahin karte 'danish'

dard-mandon ka hai jine ka tariqa kuchh aur