لفظوں میں آسانی رکھ

لفظوں میں آسانی رکھ

شعر مگر عرفانی رکھ

اتنا دھوکہ چلتا ہے

آنکھوں میں نادانی رکھ

پہلے پہل سب اچھا تھا

کچھ کچھ یاد پرانی رکھ

دھیان ہٹا اب ہونٹوں سے

قدموں پر پیشانی رکھ

کچھ بھی نہیں ہے منظر میں

آنکھوں میں حیرانی رکھ

بھوک اور پیاس نہ مٹنے پائے

اتنا دانہ پانی رکھ

سا سے کام چلا لوں گا

رے گا ما پا دھا نی رکھ

ہلکے ہلکے قدم بڑھا

سر پر بے سامانی رکھ

ہر شے میں موجود ہے جو

اس کی ایک نشانی رکھ

امتؔ بلائے وہ ہر بار

اتنی آنا کانی رکھ