lag gai mujhko ye kis shaKHs ki hae hae

lag ga.ī mujh ko ye kis shaḳhs kī haa.e haa.e

ek lamha bhī mujhe chain na aa.e haa.e

siskiyāñ āh-o-fuġhāñ aur maiñ kyā kyā dekhūñ

zulm itnā bhī koī mujh pe na Dhaa.e haa.e

jaam hāthoñ se pilātā hai vo har shaam ke ba.ad

kaash hoñToñ se bhī ik roz pilā.e haa.e

mere mahbūb tire ruḳh kī ziyārat ke liye

chāñd kī chāñdnī khiḌkī se bulā.e haa.e

ishq ke jurm meñ karvā ke giraftār mujhe

koī pāzeb kī jhankār sunā.e haa.e

dil churāte haiñ sabhī din ke ujāle meñ magar

koī rātoñ ko mirā ḳhvāb churā.e haa.e

dāstāñ ġham kī maiñ jab jab bhī likhūñ kāġhaz par

aks us māh-jabīñ kā ubhar aa.e haa.e

sāmnā ho to churā le vo nigāheñ mujh se

duur jaa.e to ishāre se bulā.e haa.e

us kī uñglī meñ vo tāsīr ki lazzat baḳhshe

jab bhī vo chaa.e meñ uñglī ko ghumā.e haa.e

us ko maiñ dekh ke aayā huuñ to kyā dekhtā huuñ

us ke ushshāq mujhe dekhne aa.e haa.e

toḌ kar dil vo mirā jab se gayā hai 'ishrāq'

dil se har vaqt nikaltī hai sadā-e-hā.e

lag gai mujh ko ye kis shaKHs ki hae hae

ek lamha bhi mujhe chain na aae hae

siskiyan aah-o-fughan aur main kya kya dekhun

zulm itna bhi koi mujh pe na Dhae hae

jam hathon se pilata hai wo har sham ke baad

kash honTon se bhi ek roz pilae hae

mere mahbub tere ruKH ki ziyarat ke liye

chand ki chandni khiDki se bulae hae

ishq ke jurm mein karwa ke giraftar mujhe

koi pazeb ki jhankar sunae hae

dil churaate hain sabhi din ke ujale mein magar

koi raaton ko mera KHwab churae hae

dastan gham ki main jab jab bhi likhun kaghaz par

aks us mah-jabin ka ubhar aae hae

samna ho to chura le wo nigahen mujh se

dur jae to ishaare se bulae hae

us ki ungli mein wo tasir ki lazzat baKHshe

jab bhi wo chae mein ungli ko ghumae hae

us ko main dekh ke aaya hun to kya dekhta hun

us ke ushshaq mujhe dekhne aae hae

toD kar dil wo mera jab se gaya hai 'ishraq'

dil se har waqt nikalti hai sada-e-hae