lagi thi umr parindon ko ghar banate hue

lagī thī 'umr parindoñ ko ghar banāte hue

kisī ne kyuuñ nahīñ sochā shajar girāte hue

ye zindagī thī jo dhutkārtī rahī mujh ko

maiñ baat kartā rahā us se muskurāte hue

badan thā chuur mirā hijr kī mashaqqat se

so niiñd aa.ī mujhe dard ko sulāte hue

koī to us pe qayāmat guzar ga.ī hogī

ki āp-bītī vo rone lagā sunāte hue

'ajīb niiñd meñ thā ḳhvāb-gāh-e-hastī kī

maiñ is jahāñ se tire us jahāñ meñ jaate hue

kahānī-go ke har ik lafz meñ thī jādūgarī

rulā diyā thā har ik shaḳhs ko hañsāte hue

na merī chashm-e-tamannā meñ jach sakī duniyā

palaT ke dekhtā kaise use maiñ jaate hue

maiñ jal uThā thā tire hī ḳhayāl kī lau se

tujhe ḳhayāl na aayā mujhe bujhāte hue

lagi thi 'umr parindon ko ghar banate hue

kisi ne kyun nahin socha shajar giraate hue

ye zindagi thi jo dhutkarti rahi mujh ko

main baat karta raha us se muskuraate hue

badan tha chur mera hijr ki mashaqqat se

so nind aai mujhe dard ko sulate hue

koi to us pe qayamat guzar gai hogi

ki aap-biti wo rone laga sunate hue

'ajib nind mein tha KHwab-gah-e-hasti ki

main is jahan se tere us jahan mein jate hue

kahani-go ke har ek lafz mein thi jadugari

rula diya tha har ek shaKHs ko hansate hue

na meri chashm-e-tamanna mein jach saki duniya

palaT ke dekhta kaise use main jate hue

main jal uTha tha tere hi KHayal ki lau se

tujhe KHayal na aaya mujhe bujhate hue