laghzish ka elan kiya hum donon ne

laġhzish kā e'lān kiyā ham donoñ ne

jurm 'azīmushshān kiyā ham donoñ ne

ik duuje ko āḳhir hāsil kar baiThe

ḳhud apnā nuqsān kiyā ham donoñ ne

pahle sannāToñ kī mahfil lagtī thī

sahrā ko vīrān kiyā ham donoñ ne

log hameñ aġhyār samajhte the shāyad

logoñ ko hairān kiyā ham donoñ ne

qurbānī kā matlab bhī mā'lūm na thā

ḳhud ko jab qurbān kiyā ham donoñ ne

ik duuje ko ik lamhe meñ tol liyā

āñkhoñ ko mīzān kiyā ham donoñ ne

hoñThoñ ko ik na.ī kahānī baḳhsh ga.e

duniyā par ehsān kiyā ham donoñ ne

laghzish ka e'lan kiya hum donon ne

jurm 'azimushshan kiya hum donon ne

ek duje ko aaKHir hasil kar baiThe

KHud apna nuqsan kiya hum donon ne

pahle sannaTon ki mahfil lagti thi

sahra ko viran kiya hum donon ne

log hamein aghyar samajhte the shayad

logon ko hairan kiya hum donon ne

qurbani ka matlab bhi ma'lum na tha

KHud ko jab qurban kiya hum donon ne

ek duje ko ek lamhe mein tol liya

aankhon ko mizan kiya hum donon ne

honThon ko ek nai kahani baKHsh gae

duniya par ehsan kiya hum donon ne