lahu bhi KHushk hota hai teri aankhon ka pani bhi

lahū bhī ḳhushk hotā hai tirī āñkhoñ kā paanī bhī

Thaharne ko hai koī dam meñ dariyā kī ravānī bhī

ḳhulūs-o-mehr kā dāman hamesha tang rahtā hai

ġhanīmat hai jo mil jaa.e tumhārī bad-gumānī bhī

sitam kis par ravā hogā tashaddud kaun jhelegā

jo mujh se chhīn loge tum matā’-e-zindagānī bhī

agar tum hī burā maano to phir ilzām kis par duuñ

tumhīñ se rahzanī sīkhī tumhīñ se pāsbānī bhī

tumhārī har nazar par munhasir hai jis tarah dekho

ye chehra ik haqīqat hai ye chehra dāstānī bhī

magar mere ta'alluq kā ye jazba ab kahāñ jaa.e

makāñ to siikh baiThe haiñ adā-e-lā-makānī bhī

ye shāyad āsmānoñ ke karishme haiñ 'shamīm' iiñ jā

qabā mailī bhī hotī hai qabā hotī hai dhānī bhī

lahu bhi KHushk hota hai teri aankhon ka pani bhi

Thaharne ko hai koi dam mein dariya ki rawani bhi

KHulus-o-mehr ka daman hamesha tang rahta hai

ghanimat hai jo mil jae tumhaari bad-gumani bhi

sitam kis par rawa hoga tashaddud kaun jhelega

jo mujh se chhin loge tum mata’-e-zindagani bhi

agar tum hi bura mano to phir ilzam kis par dun

tumhin se rahzani sikhi tumhin se pasbani bhi

tumhaari har nazar par munhasir hai jis tarah dekho

ye chehra ek haqiqat hai ye chehra dastani bhi

magar mere ta'alluq ka ye jazba ab kahan jae

makan to sikh baiThe hain ada-e-la-makani bhi

ye shayad aasmanon ke karishme hain 'shamim' in ja

qaba maili bhi hoti hai qaba hoti hai dhani bhi