lahu hamari jabin ka kisi ke chehre par

lahū hamārī jabīñ kā kisī ke chehre par

ye rūp-ras bhī sahī zindagī ke chehre par

abhī ye zaḳhm-e-masarrat hai nā-shagufta sā

chhiḌak do mere kuchh aañsū hañsī ke chehre par

navā kī gard huuñ mujh ko sameT kar le jā

bikhar na jā.ūñ kahīñ ḳhāmushī ke chehre par

is inqilāb pe kis kī nazar ga.ī hogī

ġhamoñ kī dhuup khilī hai ḳhushī ke chehre par

hazīmatoñ ke kis amboh meñ haiñ gum ham log

koī vaqār nahīñ aadmī ke chehre par

ḳharāsh-e-dard kā ā.īna huuñ mujhe dekho

ye bāñkpan bhī kahāñ hai kisī ke chehre par

bahut harīs haiñ dīda-varān-e-chehra 'fazā'

naqāb Daal ke chal āgahī ke chehre par

lahu hamari jabin ka kisi ke chehre par

ye rup-ras bhi sahi zindagi ke chehre par

abhi ye zaKHm-e-masarrat hai na-shagufta sa

chhiDak do mere kuchh aansu hansi ke chehre par

nawa ki gard hun mujh ko sameT kar le ja

bikhar na jaun kahin KHamushi ke chehre par

is inqilab pe kis ki nazar gai hogi

ghamon ki dhup khili hai KHushi ke chehre par

hazimaton ke kis amboh mein hain gum hum log

koi waqar nahin aadmi ke chehre par

KHarash-e-dard ka aaina hun mujhe dekho

ye bankpan bhi kahan hai kisi ke chehre par

bahut haris hain dida-waran-e-chehra 'faza'

naqab Dal ke chal aagahi ke chehre par