lahu jala ke ujale luTa raha hai charagh

lahū jalā ke ujāle luTā rahā hai charāġh

ki zindagī kā salīqa sikhā rahā hai charāġh

vufūr-e-shauq meñ laila-e-shab ke chehre se

naqāb-e-zulf-e-pareshāñ uThā rahā hai charāġh

hamāre saath purāne sharīk-e-ġham kī tarah

azāb-e-hijr ke sadme uThā rahā hai charāġh

ye raushnī kā payambar hai is kī baat suno

sadāqatoñ ke sahīfe sunā rahā hai charāġh

shab-e-siyāh kā aaseb Tālne ke liye

tamām umr sharīk-e-duā rahā hai charāġh

havā-e-dahr chalī hai baḌī ra.ūnat se

dayār ishq meñ koī jalā rahā hai charāġh

vo haath bhī yad-e-baizā se kam nahīñ 'ājiz'

jo ḳhāk-e-arz-e-vatan se banā rahā hai charāġh

lahu jala ke ujale luTa raha hai charagh

ki zindagi ka saliqa sikha raha hai charagh

wufur-e-shauq mein laila-e-shab ke chehre se

naqab-e-zulf-e-pareshan uTha raha hai charagh

hamare sath purane sharik-e-gham ki tarah

azab-e-hijr ke sadme uTha raha hai charagh

ye raushni ka payambar hai is ki baat suno

sadaqaton ke sahife suna raha hai charagh

shab-e-siyah ka aaseb Talne ke liye

tamam umr sharik-e-dua raha hai charagh

hawa-e-dahr chali hai baDi raunat se

dayar ishq mein koi jala raha hai charagh

wo hath bhi yad-e-baiza se kam nahin 'ajiz'

jo KHak-e-arz-e-watan se bana raha hai charagh