lahu ka zaiqa hi jab zaban tak na gaya

lahū kā zā.iqa hī jab zabān tak na gayā

to kyā ajab hai jo zaḳhmoñ pe dhyān tak na gayā

vo ek vahm jo sarmāya-e-faqīrī thā

yaqīñ meñ is tarah badlā gumān tak na gayā

badal ga.ī kahīñ raste meñ kīmiyā us kī

uThā ġhubār magar āsmān tak na gayā

anā-parast the aise badan to phir hai badan

hamārā saaya kabhī sā.ebān tak na gayā

batā ke rah ga.e sab dāv-pech sāhil se

havā ke saath koī bādbān tak na gayā

ḳhudā kā shukr ki mere hī jurm kaafī the

faqīh-e-shahr mire ḳhāndān tak na gayā

hamāre tiir chhupā.e nahīñ ga.e the 'munīr'

hamārā haat hī apnī kamān tak na gayā

lahu ka zaiqa hi jab zaban tak na gaya

to kya ajab hai jo zaKHmon pe dhyan tak na gaya

wo ek wahm jo sarmaya-e-faqiri tha

yaqin mein is tarah badla guman tak na gaya

badal gai kahin raste mein kimiya us ki

uTha ghubar magar aasman tak na gaya

ana-parast the aise badan to phir hai badan

hamara saya kabhi saeban tak na gaya

bata ke rah gae sab daw-pech sahil se

hawa ke sath koi baadban tak na gaya

KHuda ka shukr ki mere hi jurm kafi the

faqih-e-shahr mere KHandan tak na gaya

hamare tir chhupae nahin gae the 'munir'

hamara hat hi apni kaman tak na gaya