lahu ki barishen sholon ke tufan hain jahan main hun

lahū kī bārisheñ sho'loñ ke tūfāñ haiñ jahāñ maiñ huuñ

bahut hī kam vahāñ jiine ke imkāñ haiñ jahāñ maiñ huuñ

ye dhartī laakh chīḳhe ek bhī suntā nahīñ koī

ishāroñ par falak ke log raqsāñ haiñ jahāñ maiñ huuñ

bhalā kis muñh se ab tanqīd zulmat par kare koī

ki sham'eñ ḳhud añdheroñ kī sanā-ḳhvāñ haiñ jahāñ maiñ huuñ

maiñ apne āñsuoñ kā mol kyā māñgūñ ki ye motī

girāñ haiñ jis qadar itne hī arzāñ haiñ jahāñ maiñ huuñ

ab is ke baad shāyad vo hasīñ manzar na aa.egā

abhī to sirf nazreñ hī pareshāñ haiñ jahāñ maiñ huuñ

ye teġh-o-vār kā mausam guzar jaa.e to batlā.ūñ

abhī se kyā kahūñ kitne musalmāñ haiñ jahāñ maiñ huuñ

lahū meñ tar haiñ shāḳheñ phuul patte haiñ sabhī zaḳhmī

shajar saare baham dast-o-garebāñ haiñ jahāñ maiñ huuñ

ġham-e-insāñ meñ yuuñ to har koī aañsū bahātā hai

magar insāniyat se sab gurezāñ haiñ jahāñ maiñ huuñ

unheñ ye ġham ki ik mere hī tan par pairahan kyoñ hai

mujhe ye dukh ki saare jism 'uryāñ haiñ jahāñ maiñ huuñ

jo andhe haiñ unheñ nazroñ kī chāhat ho to ho 'najmī'

nazar vaale to nazroñ se pareshāñ haiñ jahāñ maiñ huuñ

lahu ki barishen sho'lon ke tufan hain jahan main hun

bahut hi kam wahan jine ke imkan hain jahan main hun

ye dharti lakh chiKHe ek bhi sunta nahin koi

ishaaron par falak ke log raqsan hain jahan main hun

bhala kis munh se ab tanqid zulmat par kare koi

ki sham'en KHud andheron ki sana-KHwan hain jahan main hun

main apne aansuon ka mol kya mangun ki ye moti

giran hain jis qadar itne hi arzan hain jahan main hun

ab is ke baad shayad wo hasin manzar na aaega

abhi to sirf nazren hi pareshan hain jahan main hun

ye tegh-o-war ka mausam guzar jae to batlaun

abhi se kya kahun kitne musalman hain jahan main hun

lahu mein tar hain shaKHen phul patte hain sabhi zaKHmi

shajar sare baham dast-o-gareban hain jahan main hun

gham-e-insan mein yun to har koi aansu bahata hai

magar insaniyat se sab gurezan hain jahan main hun

unhen ye gham ki ek mere hi tan par pairahan kyon hai

mujhe ye dukh ki sare jism 'uryan hain jahan main hun

jo andhe hain unhen nazron ki chahat ho to ho 'najmi'

nazar wale to nazron se pareshan hain jahan main hun