lahu mein apni miTTi ka asar taqsim hota hai

lahū meñ apnī miTTī kā asar taqsīm hotā hai

zamīñ taqsīm hone se bashar taqsīm hotā hai

mayassar hai sukūnat us madīne kī jahāñ aksar

añdherā bhī ḳhudā ke naam par taqsīm hotā hai

parinde chahchahānā bhūlte jaate haiñ is Dar se

havāoñ meñ jo nā-mā'lūm Dar taqsīm hotā hai

yuuñ apne bhā.iyoñ ke darmiyāñ sahmā sā rahtā huuñ

maiñ koī baat kartā huuñ to ghar taqsīm hotā hai

judā hoñ to faqat āñgan meñ dīvāreñ nahīñ uThtīñ

jo sīñchā thā mirī maañ ne shajar taqsīm hotā hai

shajar taqsīm hone se faqat saaya nahīñ kaTtā

ruteñ taqsīm hotī haiñ samar taqsīm hotā hai

kahāñ hai vo ikaa.ī sī jo pas-manzar meñ hotī thī

jo manzar hai mire pesh-e-nazar taqsīm hotā hai

usī ke sāmne dāman-kushā rahtā huuñ sadiyoñ se

vo jis ke izn se 'at.har' hunar taqsīm hotā hai

lahu mein apni miTTi ka asar taqsim hota hai

zamin taqsim hone se bashar taqsim hota hai

mayassar hai sukunat us madine ki jahan aksar

andhera bhi KHuda ke nam par taqsim hota hai

parinde chahchahana bhulte jate hain is Dar se

hawaon mein jo na-ma'lum Dar taqsim hota hai

yun apne bhaiyon ke darmiyan sahma sa rahta hun

main koi baat karta hun to ghar taqsim hota hai

juda hon to faqat aangan mein diwaren nahin uThtin

jo sincha tha meri man ne shajar taqsim hota hai

shajar taqsim hone se faqat saya nahin kaTta

ruten taqsim hoti hain samar taqsim hota hai

kahan hai wo ikai si jo pas-manzar mein hoti thi

jo manzar hai mere pesh-e-nazar taqsim hota hai

usi ke samne daman-kusha rahta hun sadiyon se

wo jis ke izn se 'athar' hunar taqsim hota hai