lahu se naqsh ibarat na mere kaam aai

lahū se naqsh 'ibārat na mere kaam aa.ī

in āñsuoñ kī sifārat na mere kaam aa.ī

mirī lahad pe 'abas bojh kis ne Daal diyā

ye pattharoñ kī 'imārat na mere kaam aa.ī

rahā najis kā najis hī ki mail thā dil meñ

mire badan kī tahārat na mere kaam aa.ī

vahāñ pe chashm-e-basīrat ne merā saath diyā

jahāñ pe chashm-e-basārat na mere kaam aa.ī

maiñ tishna-lab rahā saaqī rahā ki rind rahā

vo mai-kadoñ kī sadārat na mere kaam aa.ī

ye hukm-e-yār thā fariyād ho sar-e-mahfil

so ḳhāmushī kī jasārat na mere kaam aa.ī

uThā diyā gayā marne ke baa'd phir mujh ko

sukūt-e-dil kī sharārat na mere kaam aa.ī

vo mutribān-e-hayāt aise ḳhush-gulū the 'amar'

ajal kī koī bashārat na mere kaam aa.ī

lahu se naqsh 'ibarat na mere kaam aai

in aansuon ki sifarat na mere kaam aai

meri lahad pe 'abas bojh kis ne Dal diya

ye pattharon ki 'imarat na mere kaam aai

raha najis ka najis hi ki mail tha dil mein

mere badan ki tahaarat na mere kaam aai

wahan pe chashm-e-basirat ne mera sath diya

jahan pe chashm-e-basarat na mere kaam aai

main tishna-lab raha saqi raha ki rind raha

wo mai-kadon ki sadarat na mere kaam aai

ye hukm-e-yar tha fariyaad ho sar-e-mahfil

so KHamushi ki jasarat na mere kaam aai

uTha diya gaya marne ke ba'd phir mujh ko

sukut-e-dil ki shararat na mere kaam aai

wo mutriban-e-hayat aise KHush-gulu the 'amar'

ajal ki koi bashaarat na mere kaam aai