لہو سے تر جو خنجر ہیں یہ نفرت کی تمازت ہے

لہو سے تر جو خنجر ہیں یہ نفرت کی تمازت ہے

کہ اب جنگل سے بھی بد تر مرے شہروں کی حالت ہے

کسی دن توڑنے والوں کو یہ احساس ہو اے کاش

مہکتا پھول ٹہنی پر محبت کی علامت ہے

بڑائی ہے میاں ساری کی ساری عقل و دانش سے

وگرنہ آدمی میں کب پہاڑوں جیسی طاقت ہے

سخی کچھ تو عطا ہو جائے اب تیرے خزانے سے

مرے دست دعا میں دیکھ میرے دل کی حاجت ہے

جو اپنی ذات میں گم ہیں بھلا ان کو خبر کیا ہو

بچھڑ کر خود سے جینے میں اذیت ہی اذیت ہے

نکل کر باغ جنت سے یہ کس دنیا میں آیا ہوں

جہاں جینا اذیت ہے جہاں مرنا مصیبت ہے

بس اک ٹوٹا ہوا دل ہے وجود خاک میں ناصرؔ

بتا اس آئنے کی اب کوئی جڑنے کی صورت ہے