lamha-e-talKHi-e-guftar talak le aaya

lamha-e-talḳhī-e-guftār talak le aayā

vo mujhe apne hī me.aar talak le aayā

kyā rakhe us se koī silsila-e-guft-o-shunīd

ghar kī bātoñ ko jo bāzār talak le aayā

maiñ ne jo baat bharose pe kahī thī us se

vo use surḳhi-e-aḳhbār talak le aayā

ghar meñ jab kuchh na bachā us kī iāñat ke liye

maiñ uThā kar dar-o-dīvār talak le aayā

us kī āñkhoñ meñ ajab sehr thā maiñ jis ke sabab

dil kī bāteñ lab-e-iz.hār talak le aayā

vo jo qaa.il hī na thā merī mohabbat kā use

rafta rafta had-e-iqrār talak le aayā

mere har jhuuT ko duniyā ne sarāhā lekin

ek sach marhala-e-dār talak le aayā

lamha-e-talKHi-e-guftar talak le aaya

wo mujhe apne hi mear talak le aaya

kya rakhe us se koi silsila-e-guft-o-shunid

ghar ki baaton ko jo bazar talak le aaya

main ne jo baat bharose pe kahi thi us se

wo use surKHi-e-aKHbar talak le aaya

ghar mein jab kuchh na bacha us ki ianat ke liye

main uTha kar dar-o-diwar talak le aaya

us ki aankhon mein ajab sehr tha main jis ke sabab

dil ki baaten lab-e-izhaar talak le aaya

wo jo qail hi na tha meri mohabbat ka use

rafta rafta had-e-iqrar talak le aaya

mere har jhuT ko duniya ne saraha lekin

ek sach marhala-e-dar talak le aaya