lamhon ki tarah milna us ka sadiyon ki tarah gum ho jaana

lamhoñ kī tarah milnā us kā sadiyoñ kī tarah gum ho jaanā

yā apne kisī Thikāne se chīzoñ kī tarah gum ho jaanā

yā uñglī thaam ke chal paḌnā yādoñ ke sunahre raste par

yā haath chhuḌā kar mele meñ bachchoñ kī tarah gum ho jaanā

yā dhyān ke kone-khudre meñ yādoñ kī tarah se paḌ rahnā

yā aañkh jhapakte manzar se ḳhvāboñ kī tarah gum ho jaanā

yā kisī purānī kashtī kī sūrat sāhil kā ho rahnā

yā aan kī aan ḳhafā ho kar lahroñ kī tarah gum ho jaanā

yā āñdhī sā laḌnā us kā yā bādal sā ronā us kā

yā sard havāoñ ke Dar se chiḌiyoñ kī tarah gum ho jaanā

yā qaus-e-quzah sā raste meñ bāñheñ phailā.e mil jaanā

yā muTThī meñ aa jaate hī rangoñ kī tarah gum ho jaanā

yā phaTī purānī chunrī sā kāñToñ kī baaḌh pe lahrānā

yā na.ī-navelī dul.han ke gahnoñ kī tarah gum ho jaanā

yā kisī payambar lamhe meñ vijdān ke ziine tai karnā

yā nok-e-qalam tak aate hī lafzoñ kī tarah gum ho jaanā

yā us kā kitāb-e-dil pe kahīñ sab naam pata likkhā honā

yā chhoTe-chhoTe kāġhaz ke purzoñ kī tarah gum ho jaanā

ik shaam achānak aa jaanā be-āhaT be-dastak us kā

ik raat sirhāne likh rakkhī nazmoñ kī tarah gum ho jaanā

lamhon ki tarah milna us ka sadiyon ki tarah gum ho jaana

ya apne kisi Thikane se chizon ki tarah gum ho jaana

ya ungli tham ke chal paDna yaadon ke sunahre raste par

ya hath chhuDa kar mele mein bachchon ki tarah gum ho jaana

ya dhyan ke kone-khudre mein yaadon ki tarah se paD rahna

ya aankh jhapakte manzar se KHwabon ki tarah gum ho jaana

ya kisi purani kashti ki surat sahil ka ho rahna

ya aan ki aan KHafa ho kar lahron ki tarah gum ho jaana

ya aandhi sa laDna us ka ya baadal sa rona us ka

ya sard hawaon ke Dar se chiDiyon ki tarah gum ho jaana

ya qaus-e-quzah sa raste mein banhen phailae mil jaana

ya muTThi mein aa jate hi rangon ki tarah gum ho jaana

ya phaTi purani chunri sa kanTon ki baDh pe lahrana

ya nai-naweli dulhan ke gahnon ki tarah gum ho jaana

ya kisi payambar lamhe mein wijdan ke zine tai karna

ya nok-e-qalam tak aate hi lafzon ki tarah gum ho jaana

ya us ka kitab-e-dil pe kahin sab nam pata likkha hona

ya chhoTe-chhoTe kaghaz ke purzon ki tarah gum ho jaana

ek sham achanak aa jaana be-ahaT be-dastak us ka

ek raat sirhane likh rakkhi nazmon ki tarah gum ho jaana