lazzat-e-wasl muKHtasar mat rakh

lazzat-e-vasl muḳhtasar mat rakh

shab kī taqdīr meñ sahar mat rakh

aag kartī nahīñ kisī kā lihāz

baañs ke jañgaloñ meñ ghar mat rakh

rizq bhī be-sabab nahīñ miltā

apne bachchoñ ko be-hunar mat rakh

tujh ko sahrā meñ raqs karnā hai

paañv se bāñdh kar bhañvar mat rakh

ġhair mumkin nahīñ falak kī sair

nā-umīdī ko ham-safar mat rakh

tujh ko sonā hai qabr meñ apnī

mere a.amāl par nazar mat rakh

guftugū chal rahī hai tāroñ se

shaam kī aañkh meñ sahar mat rakh

lazzat-e-wasl muKHtasar mat rakh

shab ki taqdir mein sahar mat rakh

aag karti nahin kisi ka lihaz

bans ke jangalon mein ghar mat rakh

rizq bhi be-sabab nahin milta

apne bachchon ko be-hunar mat rakh

tujh ko sahra mein raqs karna hai

panw se bandh kar bhanwar mat rakh

ghair mumkin nahin falak ki sair

na-umidi ko ham-safar mat rakh

tujh ko sona hai qabr mein apni

mere aamal par nazar mat rakh

guftugu chal rahi hai taron se

sham ki aankh mein sahar mat rakh