لو عمر بھر کو ٹوٹ گئے گلستاں سے ہم

لو عمر بھر کو ٹوٹ گئے گلستاں سے ہم

نکلے تھے کس عجیب گھڑی آشیاں سے ہم

یہ اور بات ہے کہ قدم ہم قدم نہیں

پیچھے نہیں ہیں قافلۂ رفتگاں سے ہم

جب یاد یہ نہیں کہ پہنچنا تھا کس جگہ

اب یہ بھی کیا بتائیں چلے تھے کہاں سے ہم

رہ جائے نا تمام نہ پھر داستان شوق

تم رک گئے جہاں پہ سنائیں وہاں سے ہم

غیروں میں آ کے جی کی گھٹن کچھ تو کم ہوئی

اپنوں کے درمیاں تھے بڑے سرگراں سے ہم

تاریخ ہم کو بھول گئی ہے تو بھول جائے

زندہ رہیں گے تذکرۂ دیگراں سے ہم

افضلؔ ہماری طرح کوئی کم سخن نہ ہو

ہوتے ہوئے زباں کے بھی ہیں بے زباں سے ہم