masum se do dil kya dhaDke be-par ki uDai logon ne

mā'sūm se do dil kyā dhaḌke be-par kī uḌaa.ī logoñ ne

ḳhāmosh mohabbat bhaḌkā dī vo aag lagā.ī logoñ ne

kal shahr-e-nigārāñ meñ jab ham kuchh kho.e hue se phirte the

us kūcha-e-qātil kī hañs kar ḳhud raah batā.ī logoñ ne

phir dard uThā dil baiTh gayā phir aañkh bharī aañsū Dhalkā

afsos na jaanī is par bhī kuchh pīr-parā.ī logoñ ne

ham ne hī jalā kar dil apnā ik jashn-e-charāġhāñ kar Daalā

jab rasm-e-vafā kī mahfil meñ har sham' bujhā.ī logoñ ne

maqtal ko sajāyā qātil ne jamhūr ke ḳhūn-e-nāhaq se

zālim ke lahū kī surḳhī se ik bazm sajā.ī logoñ ne

anjān kī dil kī dhaḌkan meñ gumnām se naġhme guuñj uThe

ik dard ke nāzuk rishte kī jab baat chalā.ī logoñ ne

'jāved' ġhazal ke parde meñ jab taar diloñ ke chheḌ diye

har she'r pe sar dhunte hī rahe vo dhuum machā.ī logoñ ne

ma'sum se do dil kya dhaDke be-par ki uDai logon ne

KHamosh mohabbat bhaDka di wo aag lagai logon ne

kal shahr-e-nigaran mein jab hum kuchh khoe hue se phirte the

us kucha-e-qatil ki hans kar KHud rah batai logon ne

phir dard uTha dil baiTh gaya phir aankh bhari aansu Dhalka

afsos na jaani is par bhi kuchh pir-parai logon ne

hum ne hi jala kar dil apna ek jashn-e-charaghan kar Dala

jab rasm-e-wafa ki mahfil mein har sham' bujhai logon ne

maqtal ko sajaya qatil ne jamhur ke KHun-e-nahaq se

zalim ke lahu ki surKHi se ek bazm sajai logon ne

anjaan ki dil ki dhaDkan mein gumnam se naghme gunj uThe

ek dard ke nazuk rishte ki jab baat chalai logon ne

'jawed' ghazal ke parde mein jab tar dilon ke chheD diye

har she'r pe sar dhunte hi rahe wo dhum machai logon ne