mana abhi nishan-e-numud-e-sahar nahin

maanā abhī nishān-e-numūd-e-sahar nahīñ

maiñ tīrgī-e-shab kā magar nauhagar nahīñ

kahtā hai kaun husn-e-azal jalva-gar nahīñ

jalve to har taraf haiñ shu’ūr-e-nazar nahīñ

ehsās-o-fikr is liye ab haiñ bujhe bujhe

raushan sutūn-e-dār pe koī bhī sar nahīñ

is daur ke bashar kā muqaddar hai gumrahī

hai 'aql ḳhām-kār junūñ mo'tabar nahīñ

jiine kā ho shi'ār to ik lamha bhī bahut

hai muḳhtasar hayāt magar muḳhtasar nahīñ

jis ko bhī dekhiye vo hisār-e-anā meñ qaid

itnā baḌhī ḳhudī ki ḳhudā kī ḳhabar nahīñ

me'rāj-e-hosh ye hai ki apnī ḳhabar na ho

hai bā-ḳhabar vahī jise apnī ḳhabar nahīñ

kashkol-e-dil hai daulat-e-īmāñ se mālā-māl

shukr-e-ḳhudā hai paas mire sīm-o-zar nahīñ

tauqīr jo milī vo buzurgoñ kā faiz hai

vaise to apnī zaat meñ koī hunar nahīñ

mana abhi nishan-e-numud-e-sahar nahin

main tirgi-e-shab ka magar nauhagar nahin

kahta hai kaun husn-e-azal jalwa-gar nahin

jalwe to har taraf hain shu’ur-e-nazar nahin

ehsas-o-fikr is liye ab hain bujhe bujhe

raushan sutun-e-dar pe koi bhi sar nahin

is daur ke bashar ka muqaddar hai gumrahi

hai 'aql KHam-kar junun mo'tabar nahin

jine ka ho shi'ar to ek lamha bhi bahut

hai muKHtasar hayat magar muKHtasar nahin

jis ko bhi dekhiye wo hisar-e-ana mein qaid

itna baDhi KHudi ki KHuda ki KHabar nahin

me'raj-e-hosh ye hai ki apni KHabar na ho

hai ba-KHabar wahi jise apni KHabar nahin

kashkol-e-dil hai daulat-e-iman se mala-mal

shukr-e-KHuda hai pas mere sim-o-zar nahin

tauqir jo mili wo buzurgon ka faiz hai

waise to apni zat mein koi hunar nahin