مانا بہت اداس ہوں اس زندگی سے میں

مانا بہت اداس ہوں اس زندگی سے میں

لیکن گلہ کروں بھی تو کیوں کر کسی سے میں

ہنس ہنس کے کاٹتا ہوں یہ صحرا کی تلخیاں

پیش آ رہا ہوں دیکھیے دریا دلی سے میں

کچھ بھی نہیں ہے وقت کی رفتار سے پرے

کیا کیا نہ خواب دیکھنے والا تھا جی سے میں

زنداں میں اپنے پاؤں کی زنجیر توڑ کر

پاگل سا ہو گیا ہوں ادھوری خوشی سے میں

آؤ کہ ختم شب کا کریں کوئی اہتمام

تم تیرگی سے بات کرو روشنی سے میں

اس عارضی پڑاؤ سے جاؤں گا میں کدھر

منزل تو پا سکا نہ تری رہبری سے میں

راشدؔ یہ ہجر اس قدر آسان تو نہ تھا

بہلا رہا تھا دل کو مگر شاعری سے میں