mana gul-o-gulzar pe ranai wahi hai

maanā gul-o-gulzār pe rā'nā.ī vahī hai

manzar to badal de ki tamāshā.ī vahī hai

ujḌā thā abhī kal hī tamannāoñ kā bāzār

aur aaj yahāñ zīnat-o-zebā.ī vahī hai

chūmā hai yahāñ maiñ ne har āvāz kā chehra

in gūñjtī galiyoñ se shanāsā.ī vahī hai

ḳhushbū kī tarah uḌ ke pahuñchtī hai ḳhabar bhī

har-chand nayā shahr hai rusvā.ī vahī hai

aglī sī mirī aañkh meñ bīnā.ī nahīñ vo

ai āb-e-tamāshā tirī gahrā.ī vahī hai

halchal na huī gaañv ke tālāb meñ ik din

Thahrā huā paanī hai vahī kaa.ī vahī hai

daryāft huiiñ dahr meñ kyā kyā na zamīneñ

is dil ko magar dā'vā-e-yaktā.ī vahī hai

is dhuup meñ ik soch kā saaya rahā sar par

uTThī hai jo andar se ghaTā chhā.ī vahī hai

kahtā huuñ 'zafar' she'r to sahtā huuñ badan par

tanhā.ī vahī qāfiya-paimā.ī vahī hai

mana gul-o-gulzar pe ra'nai wahi hai

manzar to badal de ki tamashai wahi hai

ujDa tha abhi kal hi tamannaon ka bazar

aur aaj yahan zinat-o-zebai wahi hai

chuma hai yahan main ne har aawaz ka chehra

in gunjti galiyon se shanasai wahi hai

KHushbu ki tarah uD ke pahunchti hai KHabar bhi

har-chand naya shahr hai ruswai wahi hai

agli si meri aankh mein binai nahin wo

ai aab-e-tamasha teri gahrai wahi hai

halchal na hui ganw ke talab mein ek din

Thahra hua pani hai wahi kai wahi hai

daryaft huin dahr mein kya kya na zaminen

is dil ko magar da'wa-e-yaktai wahi hai

is dhup mein ek soch ka saya raha sar par

uTThi hai jo andar se ghaTa chhai wahi hai

kahta hun 'zafar' she'r to sahta hun badan par

tanhai wahi qafiya-paimai wahi hai