mana jaan-kah bahut gham ka nihan rakhna hai

maanā jāñ-kāh bahut ġham kā nihāñ rakhnā hai

ġham kā iz.hār to sho'le pe zabāñ rakhnā hai

bujhte sūraj ko harārat kī zarūrat hogī

is liye ḳhud ko abhī sho'la-ba-jāñ rakhnā hai

bāb-e-insāf isī tarh se shāyad khul jaa.e

apne har saañs ko sar-garm-e-fuġhāñ rakhnā hai

khulī āñkhoñ se to hai dekhnī duniyā lekin

apnī jānib bhī to chashm-e-nigarāñ rakhnā hai

shorish-e-ġham se na ho jaa.e tamannā majrūh

qarya-e-jāñ meñ mujhe amn-o-amāñ rakhnā hai

faisla ab ye makīnoñ hī ko karnā hogā

ghar ko ghar rakhnā hai yā ghar ko makāñ rakhnā hai

is qadar kū-e-shab-o-roz se nā-vāqif huuñ

bār-e-hastī nahīñ mā'lūm kahāñ rakhnā hai

lahja badle to badal jaatī hai fitrat 'tābish'

ham ko apnā yahī andāz-e-bayāñ rakhnā hai

mana jaan-kah bahut gham ka nihan rakhna hai

gham ka izhaar to sho'le pe zaban rakhna hai

bujhte suraj ko hararat ki zarurat hogi

is liye KHud ko abhi sho'la-ba-jaan rakhna hai

bab-e-insaf isi tarh se shayad khul jae

apne har sans ko sar-garm-e-fughan rakhna hai

khuli aankhon se to hai dekhni duniya lekin

apni jaanib bhi to chashm-e-nigaran rakhna hai

shorish-e-gham se na ho jae tamanna majruh

qarya-e-jaan mein mujhe amn-o-aman rakhna hai

faisla ab ye makinon hi ko karna hoga

ghar ko ghar rakhna hai ya ghar ko makan rakhna hai

is qadar ku-e-shab-o-roz se na-waqif hun

bar-e-hasti nahin ma'lum kahan rakhna hai

lahja badle to badal jati hai fitrat 'tabish'

hum ko apna yahi andaz-e-bayan rakhna hai