mana ki wo maujon ki tarah sina-sipar tha

maanā ki vo maujoñ kī tarah sīna-sipar thā

lekin use tūfāñ kā nahīñ maut kā Dar thā

shīshe kā badan aur pahāḌoñ kā safar thā

maiñ aa gayā vāpas ye du'āoñ kā asar thā

gahrā mirī parvāz meñ haa.il to huā hai

lekin mujhe sūraj kī tarah zauq-e-safar thā

āshufta-mizājī se ye ummīd kahāñ hai

patthar ke ta'āqub meñ koī dast-e-hunar thā

arbāb-e-nazar bhī mujhe pahchānte kyūñkar

maiñ ātish-e-ḳhāmosh thā patthar meñ guhar thā

jo haath uThā thā kabhī mazlūm ke haq meñ

dekhā to usī haath meñ mazlūm kā sar thā

hairat hai kamāñ us kī magar tiir parā.e

hālāñki vo arjun kī tarah ahl-e-hunar thā

TuuTe hue taare kī nahīñ koī bhī manzil

maiñ tujh se judā ho ke idhar thā na udhar thā

kohsār se Takrā ke pareshāñ thiiñ havā.eñ

bastī ke añdhere meñ charāġhoñ kā bhañvar thā

ham bhī the 'mushīr' ek pujāran ke pujārī

mandir bhī kisī vaqt hamāre liye ghar thā

mana ki wo maujon ki tarah sina-sipar tha

lekin use tufan ka nahin maut ka Dar tha

shishe ka badan aur pahaDon ka safar tha

main aa gaya wapas ye du'aon ka asar tha

gahra meri parwaz mein hail to hua hai

lekin mujhe suraj ki tarah zauq-e-safar tha

aashufta-mizaji se ye ummid kahan hai

patthar ke ta'aqub mein koi dast-e-hunar tha

arbab-e-nazar bhi mujhe pahchante kyunkar

main aatish-e-KHamosh tha patthar mein guhar tha

jo hath uTha tha kabhi mazlum ke haq mein

dekha to usi hath mein mazlum ka sar tha

hairat hai kaman us ki magar tir parae

haalanki wo arjun ki tarah ahl-e-hunar tha

TuTe hue tare ki nahin koi bhi manzil

main tujh se juda ho ke idhar tha na udhar tha

kohsar se Takra ke pareshan thin hawaen

basti ke andhere mein charaghon ka bhanwar tha

hum bhi the 'mushir' ek pujaran ke pujari

mandir bhi kisi waqt hamare liye ghar tha