mana koi charagh ya mashal nahin hun main

maanā koī charāġh yā mash'al nahīñ huuñ maiñ

yuuñ bhī nahīñ ki tīrgī kā hal nahīñ huuñ maiñ

kartā hai mujh meñ qatl mujhe koī saañs saañs

mar mar ke jī rahā huuñ musalsal nahīñ huuñ maiñ

hastī ne ik fareb meñ rakkhā hai mustaqil

sab ehtimām kal ke liye kal nahīñ huuñ maiñ

sadiyoñ se ho rahā hai mirā irtiqā magar

apnī nazar meñ ab bhī mukammal nahīñ huuñ maiñ

zinda huuñ ek lamha-e-maujūd ke liye

is pal ke baa'd aur koī pal nahīñ huuñ maiñ

mujh meñ huī haiñ ḳhuun tamannā.eñ ḳhud mirī

terī hī ḳhvāhishāt kā maqtal nahīñ huuñ maiñ

sahrā meñ saath kyoñ mujhe le kar chalā hai tū

paanī bharā huā koī bādal nahīñ huuñ maiñ

'āsim' ye aur baat koī dekhtā nahīñ

lekin kisī kī aañkh se ojhal nahīñ huuñ maiñ

mana koi charagh ya mash'al nahin hun main

yun bhi nahin ki tirgi ka hal nahin hun main

karta hai mujh mein qatl mujhe koi sans sans

mar mar ke ji raha hun musalsal nahin hun main

hasti ne ek fareb mein rakkha hai mustaqil

sab ehtimam kal ke liye kal nahin hun main

sadiyon se ho raha hai mera irtiqa magar

apni nazar mein ab bhi mukammal nahin hun main

zinda hun ek lamha-e-maujud ke liye

is pal ke ba'd aur koi pal nahin hun main

mujh mein hui hain KHun tamannaen KHud meri

teri hi KHwahishat ka maqtal nahin hun main

sahra mein sath kyon mujhe le kar chala hai tu

pani bhara hua koi baadal nahin hun main

'asim' ye aur baat koi dekhta nahin

lekin kisi ki aankh se ojhal nahin hun main