mand paDti ja rahi is raushni ka kya karun

maañd paḌtī jā rahī is raushnī kā kyā karūñ

sar pe ab aane lagī is tīrgī kā kyā karūñ

jis meñ tere pyaar ke vā'doñ kī TūTan hai chhupī

dil ko hai bhātī bahut vo shā'irī kā kyā karūñ

yuuñ mujhe tanhā.ī meñ rahne kī 'ādat paḌ ga.ī

jis se man miltā nahīñ us aadmī kā kyā karūñ

bevafā vo hī huā hai jis se chāhī thī vafā

prem kī is dil meñ bajtī bāñsurī kā kyā karūñ

raushnī hī raushnī hai har taraf bikhrī huī

par jo mere dil meñ hai us tīrgī kā kyā karūñ

jāntī huuñ maiñ 'kiran' dil meñ rakhe haiñ khoT vo

jo jalā de dil mirā maiñ us hañsī kā kyā karūñ

mand paDti ja rahi is raushni ka kya karun

sar pe ab aane lagi is tirgi ka kya karun

jis mein tere pyar ke wa'don ki TuTan hai chhupi

dil ko hai bhati bahut wo sha'iri ka kya karun

yun mujhe tanhai mein rahne ki 'adat paD gai

jis se man milta nahin us aadmi ka kya karun

bewafa wo hi hua hai jis se chahi thi wafa

prem ki is dil mein bajti bansuri ka kya karun

raushni hi raushni hai har taraf bikhri hui

par jo mere dil mein hai us tirgi ka kya karun

jaanti hun main 'kiran' dil mein rakhe hain khoT wo

jo jala de dil mera main us hansi ka kya karun