mahak kirdar ki aati rahi hai

mahak kirdār kī aatī rahī hai

sadāqat phuul barsātī rahī hai

sitāroñ ne kahī terī kahānī

suhānī shab tujhe gaatī rahī

nazar kis zāviye pe jā ke Thahre

qayāmat har adā Dhātī rahī hai

jahāñ apnā lahū botā rahā huuñ

vo bastī mujh se katrātī rahī hai

sulagtī chīḳhtī pyāsī zamīñ par

ghaTā ghanghor bhī chhātī rahī hai

jo mere sāmne har dam rahā hai

usī kī yaad bhī aatī rahī hai

'hayāt' us samt se aatī havā bhī

payām-e-zindagī laatī rahī hai

mahak kirdar ki aati rahi hai

sadaqat phul barsati rahi hai

sitaron ne kahi teri kahani

suhani shab tujhe gati rahi

nazar kis zawiye pe ja ke Thahre

qayamat har ada Dhati rahi hai

jahan apna lahu bota raha hun

wo basti mujh se katraati rahi hai

sulagti chiKHti pyasi zamin par

ghaTa ghanghor bhi chhati rahi hai

jo mere samne har dam raha hai

usi ki yaad bhi aati rahi hai

'hayat' us samt se aati hawa bhi

payam-e-zindagi lati rahi hai